Халықаралық құқық, І

Бұл курс британдық құқықтанушы, халықаралық құқық маманы Малкольм Шоудың «Халықаралық құқық» кітабының негізінде қазақ және орыс тілдерінде дайындалған. Аталмыш оқулық – халықаралық құқық саласы бойынша батыста жазылған ең үздік кәсіби әдебиеттердің бірі. Онда бізге бұрыннан мәлім тақырыптардан бөлек, халықаралық құқық бойынша батыстың ғылыми ой-санасының қыр-сырымен таныстыратын тақырыптар жеткілікті. Автор халықаралық құқық жөнінде батыстық доктриналардың мәнін ашып, халықаралық және халықаралық-құқықтық қарым-қатынастардың тәжірибесін тарихи, қазіргі заман тұрғысынан көрсетеді. Халықаралық сот, Ұлыбритания, АҚШ және тағы да басқа елдердің соттары қарап, шешім шығарған халықаралық-құқықтық сипаттағы істердің астарына үңіліп, оларды теориямен тығыз байланыстырады. Бұдан бөлек, М. Шоу тек Еуропа Одағы, Еуропа қауіпсіздік және ынтымақтастық ұйымы, Америка және Африка құрлықтарындағы халықаралық ұйымдармен шектелмей, Тәуелсіз мемлекеттер достастығы аясында туындаған халықаралық-құқықтық проблемаларды кеңінен саралап, өз көзқарасын білдіреді. Қысқасы, орысша, қазақша 100 дәрістен тұратын аталмыш курс аясында біз М. Шоу кітабының негізгі мазмұнын қамтып, оның еліміздің тәжірибесімен жанасатын тұстарына кеңірек тоқталуға тырыстық. Бұл дәрістер тек халықаралық қатынастар мен заң, құқық саласындағы студенттерге, магистранттарға, докторанттарға, оқытушыларға ғана емес, басқа да қоғамдық-гуманитарлық ғылым саласындағы мамандарға қызық болады деп ойлаймыз.